老婆變成屍體後（上）
結婚兩年，我有一個小煩惱。
老婆話佢鼻鼾聲好大，兩年嚟都堅持同我分房瞓，我甚至無見過佢瞓著覺個樣。
哪怕過完夫妻生活，空氣中瀰漫住曖昧嘅氣息，
佢都會毫不猶豫咁起身，返去佢自己間房，鎖門瞓覺。
呢種果斷，令我有被「趙完鬆」嘅錯覺。
不過，每個人都有自己嘅習慣，平時我同老婆都好恩愛，所以呢樣嘢我都可以接受嘅。
直到有一晚，瞓到就嚟天光，我被火警鐘驚醒。
我成個彈起，跑出客廳，見到老婆間房嘅房門緊閉，
我大力拍門：「老婆，起身啊，火燭啊！」
房間內完全無反應，我拉一拉門柄，門依然鎖住。
火警鐘響到我個頭都痛埋，唔通老婆咁都聽唔到？
我情急之下，抄起一張凳，狠狠地撞落門鎖度，一下、兩下......終於破出一個大洞，房門亦徐徐打開。
我衝入去，第一個感覺係好凍，冷氣好似開到十幾度咁。
老婆身下墊住一張墊枱用嘅大膠布，雙目緊閉。
「老婆，醒啊。」我用力搖佢，佢都無反應。
囧，有無咁好瞓啊？
我只好抱起佢，跑出間屋，沿住後樓梯一直跑落去。
好多著睡衣嘅住客企喺大廈門口，抬頭對住一個冒煙嘅單位指指點點。
睇落著火嘅單位離我屋企比較遠，消防員已經救緊火，我屋企應該無乜損失。
但係更重要嘅問題係......我老婆。
佢未醒，而且佢個身體有少少硬，我顫抖住將手移向佢嘅鼻端，無呼吸。
死咗？點解佢會死？我一路跑落嚟，都未覺得有咩唔舒服，佢應該唔至於吸入濃煙而死架。
正常嚟講，我應該叫救護車，睇吓仲有無得搶救。
但嗰一刻我遲疑咗，我諗起老婆堅持同我分房瞓、堅持鎖門、過凍嘅冷氣、床上墊嘅膠布......
一切一切，就好似佢預知自己今晚會死，怕體液會整污糟張床一樣。
一個知道自己要死嘅人，會唔會在意張床有幾乾淨？
呢個時候，天光了。
我懷裡嘅老婆悠悠醒轉：「老公，發生咩事啊？」
「火燭，我叫你唔醒，唯有抱住你跑落嚟。」我簡單答。
老婆支支吾吾咁解釋：「哦，我尋晚太攰，所以瞓得比較......」
「你仲想呃我？」我語帶怒意，一個人要幾攰，先可以瞓到無呼吸，仲有輕微屍僵？
老婆接觸到我堅定嘅眼神，猶豫咗一下，然後話：「好啦，我講。」
過咗一陣，消防員救完火，確定大廈已經無危險，就畀我哋上返去。
返到屋企，老婆嘅第一句說話係：「其實，我每晚都會死。」
根據佢所講，幾年前，佢患上怪病，每晚沉睡之後，都會死亡，天光後又會復活。
我唔明：「你瞓著咗，點知自己嘅身體死咗？」
老婆解釋：「人死後幾個鐘，屍體就會發生化學變化。如果天氣熱，好快就有少少臭，亦會流出一啲體液。」
「所以你醒番之後，就聞到自己嘅屍臭，同見到床上有體液？」聽落都幾噁心。
下集：http://bit.do/frEyg
將專頁設定為「搶先看」/ "See first"，最新故仔馬上睇！
穿越做白雪公主個阿媽：https://goo.gl/QyZJpw
如果可以自己揀阿媽：https://bit.ly/2s398bA
#短故 #短篇 #小說 #陳美濤 #廣東話 #粵語 #tomatochan #老婆變成屍體後
Search